看清現狀

看清現狀

自從自己在08年趕到順風車入了一間國際會計師行，開始「騾仔式」的audit生活。又唔打唔撞地入左一間不錯的公司，至少未至於去到「炒人」炒到上哂報紙先啦。在08-09個年，大家都同心合力地「捱過」peak season。不過，當股市樓市旺到連個D醫生加律師都打上去電台大喊連樓到買唔起之際(雖然本人都覺得果位朋友的買樓目標高到有點過份)，但是有誰知道個D比人講到「夠專業」，「為香江經濟把關」和「穿著老西日光日白在天馬艦個塊爛地跳hip pop」的「會計師」仍未渡過「寒冬」。

雖然「無薪假」完左，但唔代表「曙光」已經照到我地呢班「會計新鮮人」的身上。

很多人都以為「會計師」月薪至少都十萬八萬同時(至少上一輩會有呢個想法)，又有幾多個會想到我地「月薪」看起來好似很高，但實情我地的「時薪」分分鐘同「清潔工人」看齊。有時自己都會有一個很傻的想法，走去M記或者7仔做full-time可能仲好D添，雖然呢D工會比人睇死為「無出色，無前途」的工作。

每年都有一班由8間大「溫室」畢業的「小朋友」不惜用一切手段(不管year2報internship，或者搵人refer，同埋參加由「大四喜」的同樂會以便同D partner, manager打好D關係)，都抱「我不入地獄，誰入地獄」的「大無懼」精神，以入到「Big 4」或者衰極到要入到「2nd-tier」為「畢業個年」的目標。但是，兩年過後，結果又點，自己又得到D甚麼...

每當與自己的大學朋友gathering時，大家的話題不外乎「遲D又要返大陸，好慘呀」，「呢隻job真係wok啦,搞到晚晚到OT」，「公司又要no paid leave啦，今個月好窮呀，唔出咁多街啦」同埋「公司很多人走，我果組走餘幾個senior，下次都唔知比邊個帶」等說話。

返大陸工作，基本已經是必然的事。看看現在香港有邊D的公司(特別是中小企)在內地冇工廠或者是分公司，有D更將整個會計部搬埋返大陸，香港的headoffice只是得D高層，返內地管班下屬。自八十年代開始，香港工廠北移返內地時，就怕D大陸人唔識會計，道德唔夠得就將個會計部留返在香港姐，而家大陸D畢業生個個都曉會計準則(因為PRC GAAP 走向 IAS，再加上HKAS 有九成幾都是照炒IAS)，再加上佢地識PRC Tax (QP都要出年先開始有得讀，仲要頂多都是出都吹水level，你問死唔死)，同埋人工又平香港畢業生一大戟，所以個D以為在「Big 4」捱完3年「騾仔」生活的人要成功轉去「commercial」都不是一件易事。

自己在audit工作了兩年，未曾試過有一隻是「唔wok」，wok唔wok主要是睇client個FC(Financial Controller) 的知慧或者是manager同partner的鬆手程度，基本上缺一不可。再加上某D從「audit」成功轉去「commercial」做FC大多對auditor都抱有一種怨恨，恨不得令auditor知難而退(因為auditor問少D問題，自己少D野做)，對於呢D client，我一向會問specific的問題，一來省自己時間，二來費事比manager Q 爆(指review queries)。

至於大家都很關心的「薪酬」同「升職」的問題，前者基本上「每況愈下」，後者更不會抱有「期望」。因為audit fee (核數師酬金)在近年是「向下走」，加audit fee 只會流失客人)，以往稱為「肥豬肉」的IPO亦因為A+H事件同少左內地公司在香港上市，已經「冇肉分」。結果，專貴的老闆不會想自己的bonus減少，結果以target costing的定律下，員工的cost就要減少，但是做的working則不停增加，可想而知claim 到OT的數量如何的少。

我不是阻止D「小朋友」走進「地獄」，不過只是叫大家看清楚現實，這行不如大家想像中咁美好，「地獄式生活」並非大家想像中咁易捱過。因為你除了要應付一大埋working之前，仲有與同事和client之間的關係，以及應付manager 和partner 一大埋queries，冇返咁上下耐力同智慧的「小朋友」是難以完成首3年的艱辛旅程。

希望D「小朋友」除了懂得問「點樣interview, in D 咩之類的問題」同「邊間CPA firm wok 呀同邊組wok」之類的問題，不如睇下個現實情況，再決定落唔落地獄啦。